Հունվարի 28-29-ի լույս առավոտյան Կալիֆորնիայում գտնվող 2 հայկական մասնավոր դպրոցները՝ Ս. Նահատակաց Ֆերահեան երկրորդական վարժարանն ու ՀԲԸՄ Մանուկեան-Դեմիրճեան վարժարանը, դարձել են, ոստիկանության բնութագրմամբ, «ատելության միջադեպի» թիրախ։ Գիշերով հայկական դպրոցների տարածքում կախվել են թուրքական դրոշներ։
Ֆերահեան վարժարանի ցանկապատերին ու տարածքում կախվել են 11, իսկ Մանուկեան-Դեմիրճեան վարժարանին բաժին է հասել 2 թուրքական դրոշ։ Ֆերահեան վարժարանի անվտանգության տեսախցիկները ֆիքսել են, թե ինչպես է մի դիմակավորված անձ մոտենում ու կախում դրոշները։
Ինչպես հայտնում է Armenian Weekly-ն, միջադեպը քննում է ոստիկանությունը։
Ծնողներին ուղարկված նամակի մեջ Ֆերահեան վարժարանի տնօրեն Սոսի Շանլիանը գրել է, որ անհրաժեշտ է քայլեր ձեռնարկել՝ աշակերտների անվտանգությունն ապահովելու համար։
Աշակերտները հեռացրել են թուրքական դրոշներն ու փոխարենը կախել հայկական դրոշներ։
Հայ համայնքը վրդովված է իրենց դպրոցների ու նաև եկեղեցու նկատմամբ հարձակումներով ու նաև իրավապահների կողմից այն որպես «միջադեպ», այլ ոչ թե «հանցանք» որակելու համար։

Panorama.am