Հունվարի 23-27-ին Բելառուսի մայրաքաղաք Մինսկում կկայանա գեղասահքի Եվրոպայի առաջնությունը: Բացառիկ հետաքրքրություն է ներկայացնելու կանանց մենասահքը, ու դա հատկապես այն հենքի վրա, որ Ռուսաստանի առաջնությունում օլիմպիական խաղերի չեմպիոն Ալինա Զագիտովան չափազանց վատ հանդես եկավ՝ ցույց տալով ընդամենը հինգերորդ արդյունքը: Գաղտնիք չէ, որ նա Եվրոպայի այս առաջնությանը մասնակցում է շնորհիվ նրա, որ երկրի առաջնության առաջին երեք հորիզոնականում հայտնված մարզուհիները տարիքի բերումով միայն առաջնությանը մասնակցելու իրավունք չստացան, քանի որ տակավին դեռահասներ են:

Մասնագետները միաձայն են, որ այս առաջնությունում ռուսական Ալինա Զագիտովա-Ստանիսլավա Կոնստանտինովա-Սոֆյա Սամոդուրովա եռյակին այլընտրանք չկա, ու եթե ամեն ինչ հարթ ընթանա, մեդալները բացառապես ռուսական գրանցում կունենան: Նշենք, որ Զագիտովան Եվրոպայի գործող չեմպիոնն է: Նշենք նաև, որ համաշխարհային գեղասահք իր բուռն ներխուժումից հետո սա այս կարգի առաջին մրցաշարն է, որը հարկադրված է բաց թողնելու Եվգենյա Մեդվեդևան, որը, ի դեմս ընթացիկի, ունեցավ չափազանց ծանր մրցաշրջան, ինչին մենք մեկ անգամ չէ, որ տարբեր դիտանկյուններով անդրադարձել ենք: