Հայ հեղափոխական դաշնակցության Հայաստանի Գերագույն մարմինը խորը մտահոգություն է հայտնում կառավարության կառուցվածքում առաջարկվող մի շարք փոփոխությունների վերաբերյալ։

«Առանց հայեցակարգի, պատշաճ հիմնավորման ու հանրային քննարկման նախարարությունները միավորելու, մի շարք պետական կառավարման մարմիններ վերակազմակերպելու և լուծարելու կառավարության նախաձեռնությունը որևէ քննադատության չի դիմանում։ Խնդրահարույց և կամայական այդ որոշումը հղի է լրջագույն բացասական հետևանքներով։ Չժխտելով օպտիմալացման միջոցով պետական կառավարման համակարգի արդյունավետության բարձրացման անհրաժեշտությունը՝ չկշռադատված և շտապողական ցանկացած քայլ համարում ենք անընդունելի։ Հատկապես անթույլատրելի է Սփյուռքի և Մշակույթի նախարարությունների, որպես առանձին պետական կառավարման մարմինների, գոյությունը հարցականի տակ դնելու մոտեցումը»,- հայտարարում է ՀՅԴ-ն։

Կուսակցության Հայաստանի Գերագույն մարմինը կոչ է անում իշխանություններին՝ «վերանայել կառավարության կառուցվածքի մասին շրջանառության մեջ դրած օրենքի նախագիծը և հատկապես Սփյուռքի նախարարությանը վերադարձնել իր իսկական առաքելությունը՝ ըստ հարկի նորոգված ու բարեփոխված օրակարգով»:

Նիկոլ Փաշինյանի կառավարությունը ծրագրում է առաջիկայում օպտիմալացնել նախարարությունները, ԾԻԳ-երն ու ՊՈԱԿ-ները: Ըստ կառավարության աշխատակազմի ղեկավար Էդուարդ Աղաջանյանի՝ ներկայիս 17 նախարարությունից կմնան 11-12-ը:

Մշակույթի և Սփյուռքի նախարարությունների աշխատակիցները երեկ բողոքի ակցիա անցկացրեցին կառավարության շենքի մոտ՝ պահանջելով չլուծարել երկու գերատեսչությունները։ Նրանց ավելի վաղ Մշակույթի և Սփյուռքի նախարարների պաշտոնակատարները տեղեկացրել էին, որ փաստացիորեն իր գործունեությունն է դադարեցնում Սփյուռքի նախարարությունը, իսկ Մշակույթի նախարարության մի մասը Սպորտի և երիտասարդության նախարարության հետ միանում է Կրթության և գիտության նախարարությանը, որի արդյունքում էլ ստեղծվում է ՀՀ կրթության, գիտության, մշակույթի և սպորտի նախարարություն։